Tubig sa flowing sa South Cotabato nagakalayo kun sindihan

KORONADAL CITY– Isa ka misteryo sa gihapon para sa mga residente sang Barangay Cuyapo, Tantangan, South Cotabato ang pagkalayo sang tubig sa isa ka flowing sa ila nga lugar.

Sa ginpaala nga impormasyon sa Bombo Radyo Koronadal, nagakalayo suno pa ang tubig sa nasambit nga flowing kun ini ang sindihan.

Suno naman sa mga residente, ginakatingala nila nga bisan nagakalayo ang tubig, matugnaw sa gihapon ini sa baylo nga mag-init.

Nadiskubre suno pa nila ang nagakalayo nga tubig sa 420 ft. nga flowing 3 katuig na ang nakaligad sang tilawan nila ini nga sindihan.

Sa pihak sini padayon sa gihapon ang pagligo sang mga residente diri apisar wala pa sila makahibalo kun ano ang indi maayo nga matuga sini sa ila ikaayong lawas.