KORONADAL CITY- Natalana na nga pasakaan sang patung-patong nga kaso ang isa ka cancer kag diabetic patient nga gin-aresto sang mga otoridad matapos makuhaan sang kapin sa tunga sa milyon ka pisos nga balor sang shabu.
Ginpatigayon ang drug operation sa Purok Tagumpay, Barangay General Paulino Santos, Koronadal City kun sa diin nadakpan ang suspek nga si Franklin Biñas alias “Kano”, 51-anyos, nga napreso naman sang una apang nakaguwa matapos makapiyansa.
Ginpahayag ni PDEA-12 Information Officer Kath Abad nga magluwas sa dako nga balor sang ginapatihan nga shabu, nakumpiskar man sa suspek ang isa ka M26 kag isa ka M22 hand grenade, tag-isa ka caliber .45 kag caliber .38 nga armas , mga cellphone, kwarta kag drug paraphernalia.
Nahibaluan nga ang suspek ang may balatian nga cancer kag diabetes apang maisog sa gihapon nga nagabaligya sang iligal nga droga sa syudad.
