KORONADAL CITY– Nakatalana nga isapubliko sang Department of Agriculture ang resulta sang laboratory test sang mga baboy nga ginakabalak-an nga napatay bangud sa African Swine Flu virus, ini ang ginpahayag ni DA secretary William Dar sa farmers forum nga ginpatigayon sa Brgy. Bololmala, Tupi, South Cotabato.
Madumduman nga sang nakaligad nga mga adlaw, misteryoso nga nagmasakit kag napatay ang madamo nga mga hinuptan nga baboy partikular na sa probinsya sang Rizal nga ginasiling nga naghalin suno pa sa ASF virus.
Kaangot sini, ginbuyagyag man ni sec. Dar nga natumod na sang ila departamento ang kabangdanan sang pagmasakit sang mga hinuptan nga baboy kun sa diin ginabasol sini sa backyard hog raisers sa Rizal ang paglapta sang balatian bangud pila suno pa sa mga ini ang nagapangolekta sang sarang mapakaon sa ila mga hinuptan nga baboy halin sa mga basura nga ginahaboy na sang mga establisemento kag mga hotels.
Sa adlaw naman sang lunes Setyembre 9, 2019, nakatalana nga isapubliko ang resulta sang laboratory test sang mga napatay nga baboy agud mahibaluan kun bangud bala ini sa ASF ukon indi.
