Ginabulubanta nga yara na sa 80% na sa populasyon sang Qatar ang nagapabilin sa sulod sang ila mga balay bilang padayon nga pagsunod sa direktiba sa Qatar government.
Sa exclusive interview sang Bombo Radyo Koronadal kay Kim Peliño, Bombo International News Correspondent to Qatar, ginpahayag ni Peliño nga sa tunga sang nagapadayon nga tensyon sa Qatar, wala sang may napilasan ukon napatay sa nagluntad nga mga pagbomba sang US-Israel batok sa Iran.
Suno kay Peliño, bisan sa kahadlok nga ginbatyag sang mga residente, lakip na ang ginabanta 250,000 ka mga Pilipino nga yara sa Qatar, padayon ang ila pagpabilin nga alerto.
Gidugang pa niya nga padayon sila nga nagapanago sa ila tagsa ka shelter bilang pagpanalipod sa ila kaluwasan.
Samtang nagapadayon ang mga pag-atake, ginpahayag man niya nga aktibo ang Qatar forces sa pag-intercept ukon pag-kontol sang mga missile nga nagalupad sa ila teritoryo, rason nga napunggan ang mas dako nga disgrasya.
Bangud sini, nagpanawagan si Peliño sa publiko ilabi na sa mga pamilya sang mga OFWs sa Qatar sang pangamuyo kag padayon nga pagmonitor sang sitwasyon.//Gin-awhag man niya ang mga pamilya sa Pilipinas nga magpabilin nga alerto kag magpangamuyo para sa kaluwasan sang ila mga himata nga OFWs sa Qatar.
