Naglab-ot sa walo (8) ka Chinese nationals kag isa (1) ka Hong Kong national ang nadakpan sa ginpatigayon nga Joint Law Enforcement Support Operation (LESO) sa Helen Grace S. Camsa Precious Metal Mining Company, nga nahamtang sa Sitio Mangas, Barangay Chua, Bagumbayan, Sultan Kudarat, sang nagligad nga semana.
Ang mga nadakpan nga foreign nationals nakit-an nga may pag lapas sa Section 37(a)(7) sang Philippine Immigration Act, nga nagatukoy sa “working without proper work visa/permit or undocumented status,” kag Section 45(F) sang amo man nga layi nga naga-igo sa “misrepresentation’.
Base sa Mission Order nga ginpagwa sang Bureau of Immigration (BI) sang Abril 7, 2025, ang operasyon ginpatigayon sa koordinasyon sang BI – Regional Intelligence and Operations Unit XI (BI-RIOU XI), 7th Infantry (TAPAT) Battalion sang TRISCA Command, LTCCA Officer, AFP Intelligence Units kag Bagumbayan Municipal Police Station (MPS).
Gintugutan sila sa pagpatigayon sang aksyon batok sa mga undocumented nga Chinese nationals nga iligal nga nagatrabaho sa ginatukod nga mining processing plant nga wala sang work permit.
Ginpa-athag ni LTC Vallescas ang kahanda sang ila yunit sa paghatag suporta sa nasambit nga LESO kag sa mga masunod pa nga operasyon nga nagatuyo nga panalipdan ang layi kag masiguro nga ang tanan nga dayuhan nga ara sa Pilipinas, nagasunod sa mga kasuguan sang pungsod.
Sa pihak nga bahin, ginpasidunggan ni BGEN Michael A. Santos PA, Commander sang 603rd Infantry (Persuader) Brigade, ang mga tropa sang 7th Infantry (TAPAT) Battalion kag tanan nga ahensya nga kabahin sang operasyon. Gindayaw niya ang ila propesyonalismo, maayo nga koordinasyon, kag paspas nga pagpatuman sang operasyon nga nagtugas sang epektibo nga pagpangdakop kag pagpatuman sang mga layi sang imigrasyon sa nasambit nga lugar.
Ginpabutyag pa niya ang kahalagahan sang pagpabilin nga mabinantayon batok sa mga iligal nga aktibidad sa trabaho nga posible magpahamtang sang peligro sa seguridad sang nasyon kag mangin kahigayunan para sa pagsamantalahan sang lokal nga mga kinaiya kag rekurso.
Sa subong, ang mga nadakpan nga foreign nations uyat na sang BI-RIOU XI sa Davao City para sa dugang nga dokumentasyon kag legal nga proseso.
