KORONADAL CITY – Naglab-ot sa pito ang ginbawians ang kabuhi, apat naman ang arestado kag isa ka pilason sa ginlunsar nga operasyon sang kapulisan sa Sitio Tina, Barangay Mileb, Rajah Buayan, Maguindanao alas-kuwatro kaina sang kaagahon.
Suno kay CIDG BAR Assistant Regional Chief, PLt.Col. Ernor Melgarejo, target sang operasyon ang ginatudlo nga wanted person nga si Torque Utto Latip nga nagapanago sa lugar.
Suno kay Melgarejo, apat ka bulan na nga ginasubaybayan sang CIDG BAR ang hulag sang grupo ni Torque antes ginlunsar ang operasyon.
Nahibaluan nga pasulod pa lamang ang kapulisan sang ginpukpan na sila sang grupo ni Torque rason nga napilitan nga magbalos ang mga ini.
Bangud sa engkwentro nga natabo, napatay si Torque kag ang anum ka mga kaupod sini samtang nagsungka naman kag gin-arestar ang apat pa ka mga kaupdanan sang mga ini.
Samtang, napilasan naman ang isa ka pulis nga katapu sang operating unit.
Nakumpiskar sang mga pulis ang duha ka Homemade Barret, isa ka Garand Rifle, Improvised Garand, Grenade Launcher, M16 Rifle, M16 Rifle with M203, 9MM Ingram, M14 Rifle kag nagkalain-lain nga mga bala sang armasl.
Sa subong yara na sa kustodiya sang mga kapulisan ang mga kaupdanan ni Torque kag natalana nga pasakaan sang nagakaigo nga kaso.
