KORONADAL CITY – Emosyunal nga nagpasalamat sa Bombo Radyo Philippines ang 1 sa 7 Overseas Filipino Workers ukon OFWS matapos nga nakapauli sang luwas sa Pilipinas halin sa Saudi Arabia.
Sa interbyu sang Bombo Radyo Koronadal kay Ariel Relojas, 49-anyos, may asawa kag residente sang Norala, South Cotabato kag isa ka surveyor sa Saudi Arabia, tuman sini nga ginpasalamatan ang Bombo Radyo kag si Bombo International Correspondent Boyet Forro matapos ang kalbaryo nga ini kag ang mga kaupdanan nga OFW sa nasambit nga pungsod.
Suno kay Relojas, kapin 1 katuig suno pa sila nga wala ginapasweldo sang ila komboyohan nga Project Belt Company tubtob sa tigayon sini nga pagkalugi.
Magluwas diri, nasunog man suno pa ang ila ginatiniran nga shelter kag wala sang nasakbar nga gamit kag wala na sila nakakaon sang tama.
Kadungan sini, personal nga nagpangayo sang bulig ang iloy ni Relojas sa Bombo Radyo Koronadal kag na nakigpag angot kay Bombo Boyet nga gilayon naman nga ginpa asikaso ang deportation documents sang mga ini.
Ginpahayag ni Forro nga gilayon naman nga nagpalab-ot sang si Labor Attache Nasser Mustafa sang POLO-Riyadh agod nga mapadasig ang proseso sang pag-papuli sang 7 OFW sa Pilipinas.
Sa subong , kaupod na ni Relojas sa iya pamilya kag ginpalab-ot man sini ang pagpasalamat sang 6 ka mga kaupdanan sini sa Bombo Radyo Philippines.
