KORONADAL CITY- Ginkumpirmar sang isa sa mga survivors nga si Pastor Isaac Piang nga may mga kaupdanan pa sila sa Brgy Luayon nga tubtob sa subong wala pa nakadulhog kag naluwas halin sa nabukid nga bahin sang nasambit nga barangay.
Nahibaluan nga may mga nabilin pa kag na trap sa lima ka mga sitios nga ginakabug-usan sang Sitio Kapatagan, Silang, Mt. Luayon, Midtabal kag Santos nga ginakabalak-an subong bangud sa wala sang pagkaon kag tuman ka lain ang paniempo.
Bangud sini posible kinahanglan pa nga mag usar sang air assets ang gobyerno agud nga matumod kun diin na ang mga biktima.
Nahibaluan nga emosyonal nga ginsaysay ni Pastor Piang nga ang iya pamilya ang nagbagtas sang masobra 7 ka oras agud nga makaluwas lamang sa landslide tuga sang mabaskog nga linog.
Ginakabig naman sini nga ikaduha nga kabuhi ang ila nga kaluwasan sa nasambit nga kalamidad sa bulig sang mga katapo sang Armed Forces of the Philippines.
