KORONADAL CITY – Padayon sa karon ang monitoring sang militar angot sa mga nakasulod nga mga foreign terrorist sa Pilipinas nga posible nagabulig sa mga local terrorists.
Sa esklusibo nga interbyu sang Bombo Radyo Koronadal kay WESMINCOM Spokesperson Major Arvin Encinas, 7 ang kumpirmado nga mga foreign terrorists ang nakasulod sa pungsod nga posible suno pa nga ginasapupo kag nagasuporta sa BIFF kag Abu Sayaff.
Suno kay Encinas, magluwas sa nasambit nga mga dumuluong nga mga terorista may iban pa ka mga terorista halin sa iban nga pungsod ang ila nga ginamonitor agud nga masiguro nga indi ang mga ini mahatagan sang tion nga makalunsar sang pagpang-atake.
Samtang sa pihak nga bahin, gginpa-athag ni Encinas nga nagapabilin sa gihapon ang mga lider sang mga local terrorist group sa pungsod kasubong sang BIFF Bongus Karialan kag Abu Toraife nga yara sa bahin sang Jolo, Sulu.
Sa karon, ginhingyo man sang militar ang hugot nga kooperasyon sang publiko sa pagbantay sang seguridad.
