May mga tawo nga nakulbaan gid sa pagsakay sa eroplano.
Ano pa gid ayhan kun ikaw na ang mapalupad sini, tapos wala pa ikaw sang ihibalo kun paano ini imanehar?
Amo ini ang natabo sa mag-asawa didto sa Estados Unidos sang Amerika sang naabtan sila sang emerhensya samtang yara sa kahawaan.
Ang piloto amo si Eliot Alper, 78, samtang kaupod sini sa gamay nga eroplano ang iya asawa nga si Yvonne Kinane-Wells, 69.
Halin sila sa Henderson Executive Airport sa Las Vegas kag pakadto na kuntani sa Monterey, California.
Samtang nagalupad ang eroplano, gulpi lang nga gin-atake sa korason ang piloto.
Sa una, grabe ang panic sang asawa bangud magluwas nga malain ang kondisyon sang iya bana, indi pa siya makahibalo magmanehar sa eroplano kag wala gid siya nakaagi training.
Apang mind over matter, nangisog ini sa flight deck, ginkontak ang air traffic controller, kag ginsunod ang tanan nga ginahambal sini sa radio.
Pila ka minutos ang nagligad, natigayon ang emergency landing sa Bakersfield, California kun sa diin nagahulat ang emergency vehicles tubtub dalayon nga napa-untat sang asawa ang eroplano.
Gindala gilayon ang bana sa ospital, apang amo na lang ang paghilibion sang asawa bangud ginbawian gihapon ini sang kabuhi.
Madamo gid ang nagdayaw sa pagka-kalmado sang babaye kag mangin ang director sang airport ang nagbilib kag nagsiling nga wala pa siya nakaagi-kita sang amo nga insidente sa iya bilog nga karera.
Bilang pagsunod sa proseso, may imbestigasyon sa gihapon nga patigayunon ang Federal Aviation Administration kag National Transportation Safety Board kaangot sa amo nga insidente.
