KORONADAL CITY – Yara na sa kustodiya sang mga otoridad ang ginatudlo prime suspect sa paglugos-patay sa isa ka 13-anyos nga babaye sa banwa sang Banisilan, North Cotabato.
Ginkilala ni Major Elmier Parreño, hepe sang Banisilan PNP ang naaresto nga suspek nga si alyas Renier, taga Barangay Kadingilan, Wao, Lanao del Sur .
Suno kay Major Parreño, nadakpan ang suspek matapos ang ginpatigayon nga hot pursuit operation makaligad man nga makita ang motorsiklo sini malapit sa lugar kun sa diin nasapwan ang bangkay sang bata nga ginkilala lamang kay Alias Mary.
Naguwa sa imbestigasyon sang mga otoridad nga, biyernes sang gabi sang nagtambong sa isa ka birthday party si Mary kag naglakat lamang pauli upod ang utod sini kag isa pa nila ka paryente.
Nag-agi suno pa ang suspek sakay sang motor kag ginhagad ang bata nga magsakay.
Apang, wala na nakapauli pa ang biktima kadungan man sang pagka-missing sang suspek sa barangay.
Sabado sang kaagahon na sang masapwan ang bangkay sang biktima sa isa ka bakante nga lote sa Barangay Puting Bato.
Dugang pa sang chief of police sang Banisilan, posible nga ginlugos anay ang bata antes nga ginpatay paagi sa paglampos sang matig-a nga butang sa ulo sini.
Sa karon, ginahibalo pa sang kapulisan kung involbado sa illegal drugs ang suspect samtang natalana naman ini nga pasakaan sang nagakaigo nga kaso.
