KORONADAL CITY – Indi suno pa makaapekto ang ginapatigayon nga rally sang mga anti kag pro sa open pit mining sa probinsya sang South Cotabato sa desisyon nga pagahimoon sang gobernador sang probinsya sa issue sa pagpahanugot sang mina.
Ini ang nangin pahayag ni South cotabato Governor Reynaldo Tamayo Jr.
Suno sa iya, indi mangin mabug-at ukon big deal ang rally nga ginapatigayon sang magtimbang nga bahin sa iya nga personal nga desisyon.
Bangud sa pahayag sini, nakaangkon ini sang nanari-sari nga mga reaksiyon sa social media kag sa komunidad bangud kulukasubong nga wala lamang sang pulos ang pagpatigayon sang nilibo ka mga residente sa South Cotabato bangud indi man suno pa ini mangin balasehan sang Gobernador.
Dugang pa sini, himoon niya kun anu ang sa panan-awan niya nga husto para sa bilog nga South Cotabato kag indi maimpluwensyahan sang mga ginapatigayon nga rally.
Madumduman nga ginpahayag man sang gobernador nga may veto man ukon wala, madayon sa gihapon ang mina sa probinsya bangud suno pa wala siya mahimo bilang ehekutibo bangud halin daw ang permit sa national office.
Ginkatingala naman sang pipila ang nangin desisyon nga ini sang gobvernador nga daw kulukasubong nga indi na man mamati ang gobernador sa mga ginahangyo sang kadam-an.
Gin-insister pa gani sini nga nagakaangay suno pa nga indi na lang mag-usar sang relo, sing-sing , cellphone, butones, kag zipper ang mga nagapahayag nga anti-mining ang mga ini.
Dugang pa sang gobernador nga may mga mabatianman siya labi na sa mga anti sa open pit nga nagapahayag nga “There is no such thing as responsible open pit mining” apang may nga gina usar man nga mga produkto sang mina sa ila nga pagpangabuhi parehas sang cellphone kag mga zipper nga halin sa mina.
Dugang pa sini, kun nagapati ang mga anti sa open pit nga indi matuod ang responsable nga pag mina, indi nalang daw suno pa dapat nga mag usar sang mga produkto sang mina ang mga ini.
Madamo naman ang dismayado sa posisyon sang gobernador bangud daw naga pakita lamang suno pa sang pagpakuno- kuno ang gobernador nga para ini sa kadam-an apang wala ini sang plano nga balabagan ang pag-operar sang SMI kag kulukasubong nga pro-mining gid man ini.
