KORONADAL CITY – Nagapadayon sa karon ang imbestigasyon sang mga otoridad sa nagluntad nga disgrasya nga ginaka-imbolbaran sang isa ka pampasahero nga van kag isa ka mixer truck sa banwa sang Tantangan, South Cotabato.
Suno kay Pol Capt Romeo Albano, hepe sang Tantangan PNP ginpahayag sini nga nautdan sang wala nga tiil ang driver sang mixer truck nga ginkilala kay Juvy Aleta, 45-anyos kag residente sang Lebak, Sultan Kudarat makaligad nga mabungguan suno pa sang isa ka van.
Base sa inisyal nga imbestigasyon sang Tantangan PNP, bag-o lang suno pa nagtakop ang pag-unload sang semento ni Aleta sa ginahimo nga construction sa Prk 5, Brgy Dumadalig, sa nasambit nga banwa sang nabungguan suno pa ini sang van nga ginamaneho naman ni George Bacoy, yara sa legal nga edad kag residente sang Polomolok, South Cotabato.
Gin-ako man suno pa sang driver sang van nga napiyungan ini samtang nagadrive nga rason naman sang nasambit nga disgrasya.
Magapadulong kuntani sa Tacurong City ang van nga may sakay pa nga 2 ka pasahero nga ginkilala kanday Rex Dela Cruz kag Jestoni Olanda nga napilasan sang magluntad ang insidente.
Sa karon, yara na sa kustodiya sang Tantangan PNP si Bacoy para sa nagakaigo nga interogasyon.
