KORONADAL CITY – Naglab-ot sa anum (6) ang patay samtang duha naman ang pilason sa pagkahulog sang isa ka kotse sa pampang sa kurbadahon nga dalan sa bahin sang Barangay Nagpan, Malungon, Sarangani Province alas 3:20 sa hapon, Agosto 29.
Sa ginpaguwa nga datos sang mga otoridad, ginkilala ang mga napatay sa sanday: Jay-ar Tabayag Mandawan, 34-anyos (drayber); Quiroben Saraduma Luchavez, 39-anyos; Ernesto Mucia Xicay, 57-anyos, (foreign national); Mary Ann Lupian; Quirvie Lupian, 5-anyos kag Quizia Lupian, 3-anyos.
Samtang ang duha (2) ka mga survivors amo sanday Nora Albuena Pellejo kag Queran Lupian, 1-year old bata nga lalaki.
Naguwa sa imbestigasyon sang kapulisan nga halin sa General Santos City ang mga biktima kag papuli na kuntani sa Mati City sang nadulaan sang kontrol ang driver sang salakyan kag nahulog ang kotse sa pil-as nga yara sa ginabulanta nga 15 meters ang kadalumon.
Sa kasamtangan,nagapaayo sa Malungon Municipal hospital ang duha ka pilasan apang wala gid mahingagaw ang kabuhi sang 6 ka napatay.
Sa karon, nagapadayon pa ang imbestigasyon sang mga otoridad sa nagluntad nga insidente.
