6-anyos napatay bangud sa rabies

KORONADAL CITY – Nagapangasubo subong ang pamilya sang isa ka 6 anyos nga bata nga lalaki matapos nga mapatay bangud sa rabies.

Sa panaysayon sang amay sang biktima, ginkagat sang ido ang nawong sang iya bata sa ila nga puluy-an sa Barangay Takunil, Lake Sebu, South Cotabato.

Apang, wala gilayon madala sa hospital bangud una nila ini nga gindala sa isa ka “tandok”.

Tubtob sa wala ginalauman sang iya pamilya nga pagkaligad sang tatlo ka bulan, naglain na ang batasan sang bata kag nahadlok ini sa tubig kun diin may mga sintomas ini nga infected sang rabies.

Bangud sa nagawaras na ang bata gindala nila ini sa hospital agud mabulong apang tigayon na ini nga napatay.