KORONADAL CITY – Tubtob sa subong wala pa nagatahaw ang kasubo sang pamilya Pabalinas angot sa nadangtan sang ila himata nga isa sa mga ginakabig Fallen 44 nga si PSInsp. Ryan Pabalinas.
Kaangot ini sa pagdumdom subong nga adlaw sang ikalima ka tuig nga anibersaryo sang Mamasapano incident nga ginkapatay sang 44 ka mga katapu sang PNP-Special Action Force sang Enero 2015.
Para kay PCapt. Richard Pabalinas, utod sang Napatay nga SAF44 member sa ekslusibo nga interbyu sang Bombo Radyo Koronadal, yara gihapon ang kasubo kag kaakig nga ila nabatyagan apang bilang isa ka pulis, nabaton na niya suno pa ang nadangtan sang iya utod labi na nga kabahin ini sang ila ginsumpaan nga trabaho.
Padayon man ang pagbaton sang mga benepisyo gikan sa gobyerno sang nabilin nga pamilya sang iya nga utod apang mas maayo kuntani nga buhi siya.
Samtang, nagapati naman si Pabalinas nga dapat manabat si anay Pangulong Benigno Aquino III bilang commander-in-chief bangud nga responsable siya sa decision-making ilabi na sa nadangtan sang ila nga mga tropa.
Sa subong nga adlaw naghalad sang misa ang pamilya Pabalinas kadungan sa pagdumdum sang kabaganihan ni PInsp. Ryan.
