KORONADAL CITY- Nagapadayon sa subong ang imbestigasyon sang pamunuan sang South Cotabato Provincial Rehabilitation and Detention Facility kun sin-o ang mga posible nga nagapasulod sang iligal nga droga sa sulod sang presuhan.
Ini makaligad magpositibo ang yara sa 58 ka mga inmates sa ginpatigayon nga suprise drug test kun sa diin suno kay Jail Warden Felicito Gumapac, ginkakibot kag ginkaakig sini nga sa pihak sang hugot nga kampanya sang gobyerno batuk sa iligal nga droga, mismo sa sulod sang presuhan nakausar ang mga inmates sang drugs.
Samtang kaangot sini, ginabasol naman ni Gumapac sa nakaligad nga administrasyon sang Provincial Jail base sa mga testigo ang pag usar sang mga inmates sang iligal nga droga bangud suno pa sa kapabayaan kun sa diin una naman nga may 30 ka inmates nga nagpositibo nga wala suno pa napahamtangan sang silot.
Kaangot sini, gintilawan naman nga kuhaon sang Bombo Radyo Koronadal ang bahin sang anay Jail Warden nga si Juan Lanzaderas apang nagpamalibad anay ini nga magpa interbyu.
Sa karon may lead na ang mga otoridad sa pila ka mga kakuntsabo sang mga inmates sa sulod kag sa gwa sang presuhan nga nagapasulod sang mga iligal nga kontrabando ilabi na ang iligal nga droga.
