KORONADAL CITY – Nagapanawagan subong kay Pres. Rodrigo Duterte ang himata sang isa sa mga bihag sang bandido nga Abu Sayyaf Group makaligad ginkidnap ini sa bahin sang kadagatan sang Pagadian takna alas 3 sang kaaagahon kalakip ang mga kaupdnanan nga mangingisda.
Sa ekslusibo nga interbyu sang Bombo Radyo Koronadal sa pamilya sang isa sa mga bihag nga taga Sto. Niño South Cotabato nga ginkilala kay Reyjim Rocabo 40 anyos kag nagatrabaho bilang assistant sang kapitan sang barko sa Ramona Fishing Corporaton, ginpahayag sang iloy sini nga si Milagros Racabo nga nakontak pa nila ang ila bata sang Disyembre 20, 2016 kun sa diin base suno pa sa ila ulihi nga komunikasyon kay Reyjim uyat ini kag ang iya mga kaupdanan nga sanday Noel Esconde; kapitan sang barko 45 anyos, Roel Leones 30 anyos kag Roy Ramos 36 anyos kun sa diin ginkuha ang tanan nila nga ginkitaan kag pati mga gamit.
Sa subong yara suno pa sila sa isla sang Basilan makaligad gindala sang bandido nga grupo kun sa diin ginakahadlukan nga yara sa ital-ital ang ila kabuhi bangud sa ila nabaton nga ulihi nga impormasyon naipit ang mga ini sa engkwentro.
Tuman naman ang pagpanawagan sang pamilya ni Rocabo nga mabuligan sila nga makapauli nga buhi si Reyjim kag mga kaupod sini ilabi na nga wala sila sang ikasarang nga magbayad sang tuman ka dako nga ransom money.
