KORONADAL CITY – Nagapadayon ang assessment sang Municipal Disaster Risk Reduction and Management Office ukon MDRRMO sang Lake Sebu, South Cotabato makaligad ang nagluntad nga landslide.
Suno kay MDRRMO Action Officer Roberto Bagong, 5 ka puluy-an ang naguba bangud sa nasambit nga landslide nga resulta naman sang asod-asod nga pag-ulan sa probinsya.
Magluwas suno pa sa mga naguba nga puluy-an, naka-angkon man sang litik ang pila ka dalanon sa nasambit nga banwa, nga gilayon naman nga ginpalab-ot sa DPWH agud nga ma-aksyunan.
Kaangot sini, ginpabakwit man ang mga residente nga nawad-an sang puluy-an kag temporaryo nga nagatinir sa Brgy Gym.
Ginrekomendar man sang LGU ang pagbakwit sang mga residente nga malapit sa landslide prone areas ilabi na kun may pagpamahog sang landslide
Ginpahanumduman man ang mga ini nga doble halong sa posible nga matabo nga kalamidad.
Sa karon, padayon pa nga ginahibalo ang kabug-usan nga damyos sang nasambit nga landslide.
