KORONADAL CITY- Nagapaayo na subong ang mga indibidwal nga naulamid sa pagkarambola sang mga salakyan sa Brgy. Carpenterhill syudad sang Koronadal.
Sa interbyu sang Bombo Radyo Koronadal kay Police Corporal Fely Bascon, imbestigador sang Koronadal City Traffic Section, sakay sang Kia Bongo nga may plate number nga MAA-1974 si Cristitito Cappol, 51 anyos kaupod ang asawa sini kag duha ka mga kabataan halin sa isa ka birthday party kag papuli na kun tani sa Prk. Dumpsite, Brgy. Saravia Koronadal sang masugata nila ang Isuzu Crosswind Wagon nga may plate number nga MAX450 nga ginamaneho ni Romeo Salarda, 63 anyos may asawa nga taga Brgy. GPS, Koronadal nga papuli man kun tani.
Nagbunggua-anay ang Bongo kag Crosswind kag may nagasunod man sa Kia Bongo nga bus sang Mindanao Star.
Nabungguan man sang Bus ang likod nga bahin sang Kia Bongo nga gintunaan sa pagkapilas sang mag-asawa kag 2 ka menor de edad nila nga mga kabataan kun sa diin gindangat ang mga ini gilayon sa balay bululngan.
Samtang si Salarda pilason man kag gindangat sa balay bululngan.
Maayo na lamang bangud wala sang napagkit nga patay apang padayon ang imbestigasyon sang Koronadal City Traffic.
