KORONADAL CITY– Boluntaryo nga nagsungka ang 5 ka mga miyembro sang New People’s Army nga ginalakipan sang 1 ka kumander sa Brgy. Kamasi, Ampatuan sa probinsya sang Maguindanao.
Ang mga rebelde ang nagsungka mismo kay Lt. Col. Lauro Olivero ang commanding officer sang 1st Mech Battalion makaligad indi na suno pa nila masarangan ang kabutigan nga ginapalapnag sang NPA sa T’boli Community sa T’boli, South Cotabato agud mag rebelde ang mga lumad sa gobyerno.
Nahibaluan nga ang mga nagsungka amuh ang mga miyembro sang Platoon Samsung GF 73 nga ginkilala nga sanday Sing O Maquil, 30 anyos, Daniel Fonok, 25 anyos, Panni L. Sina, 18 anyos, Marvin Ginang 30 anyos kag ang ginasiling nga NPA commander nga si Taan Ayunan, 37 anyos nga lunsay mga lumad halin sa Brgy. Ned Lake Sebu, South Cotabato.
Dugang pa sini nga indi suno pa nila ma-agwantahan ang gutom kag kahadlok samtang nagapanago sa kabukiran kun sa diin pila sa mga kaupdanan suno pa nila ang napatay na sa balatian nga dengue kag tuberculosis.
Samtang kadungan sang ila pagbalik sa gobyerno, ginsungka naman nila ang ila 2 ka homemade Ingram kag 1 homemade Uzi.
