KORONADAL CITY – Gilayon nga ginpaidalom sa interogasyon ang lima ka mga ginapatihan nga myembro sang Bangsamoro Islamic Freedom Fighters (BIFF) kag ISIS inspired group nga naaresto sang gintingob nga pwersa sang kapulisan kag mga suldado sa banwa sang Paglat, Maguindanao.
Ini ang ginkumpirmar ni Lt. Col. Harold Cabunoc, commanding officer sang 33rd IB sa interbyu sang Bombo Radyo Koronadal.
Suno kay Cabunoc, target sang ginpatigayon nga operasyon sang gintingob nga pwersa sang 33rd IB, 1st Mechanized, 7th Field Artillery Batallion kag 4th Special Action Batallion ang grupo ni Sindatok Dilna alyas Motolite nga suno pa tinawo man ni Kumander Gani Saligan sang BIFF.
Si Kumander Motolite kag ang grupo man sini ang nagaserbe nga private armed groups sang mga kilala nga pulitiko sa nasambit nga lugar.
Sa subong nagpamalibad anay nga hingadlan ang 5 ka mga naaresto bangud sa ginahibalo man ang kaangtanan sang mga ini sa local terrorist nga ISIS nga padayon suno pa ang recruitment sa lugar.
Nakuha sa mga suspek ang 18 armalite rifle, 2 M 19 kag 11 ka caliber 45 nga suno pa ginagamit sang mga ini sa pagpakig-away sa armadong kusog sang pungsod.
Natalana naman nga pasakaan sang nagakaigo nga kaso sa lunes ang mga naarestar nga mga BIFF members.
