KORONADAL CITY – Naglab-ot sa lima katawo ang nadakpan bangud sa paglapas sa comelec gun ban kadungan sang extension sang filing sang Certificate of Candidacy (COC) sang Sabado.
Ini ang ginkumpirmar ni Atty. Michael Abbas, director sang Comelec Region 12 sa interbyu sang Bombo Radyo Koronadal.
Suno kay Abbas, ang nasambit nga mga indibidwal ang nadakpan sa ginlunsar nga check point sang mga otoridad.
Nahibaluan nga nagpatigayon na sang masobra 100 check points ang mga otoridad sa sulod lamang sang 7 ka adlaw humalin sang Abril 14, 2018 sa pagsugod sang COC filing.
Bangud sini, ginpalab-ot ni Abbas ang pagpasalamat sa pagpatigayon sang check point sang PNP sa Rehiyon Dose.
Samtang, aminado naman ang opisyal nga may mga ginatutukan sila nga barangay sa Reg. 12 nga ginakabig nga “areas of immediate concerns” sa subong nga election period.
Apang, nagpamaluibad anay nga hingadlan sini ang mga barangay sa baylo ginpasiguro sini nga nakatutok ang PNP kag AFP sa nasambit nga mga lugar.
