KORONADAL CITY – Naglab-ot sa halos tunga sa milyon ukon P450,000.000 ang ginbilin nga damyos sa pagpanalasa sang buhawi kag mabaskog nga ulan sa banwa sang Tupi, South Cotabato.
Ini ang ginkumpirmar ni Municipal Disaster Risk Reduction Management Office (MDRRMO) Emil Sumagaysay sa interbyu sang Bombo Radyo Koronadal.
Suno kay Sumagaysay, ini ang base sa inisyal nga assessment sang ila nga talatapan.
Sa nasambit nga kalamidad, 7 ka pamilya ang apektado kun diin 2 ka puluy-an ang tigayon nga naguba samtang 5 naman ang partially damage.
Magluwas diri, madamo man nga linya sang kuryente ang nautod nga nagtuga sang pila ka oras nga brownout kag may duha pa ka CCTV camera nga naguba.
Madamo naman nga mga puno sang kahoy ang natumba sa national highway kag mismo sa municipal ground.
Nakaeksperiensiya man sang baha sa pila ka mga Purok sa Barangay Poblacion matapos nga gin-ulan sang ice sa sulod sang 10 ka minutos.
Kaina sang aga nagpadayon ang clearing operation sang mga otoridad samtang padayon naman ang ginahimo nga assessment sa mga apektado nga pamilya agud nga mahatagan ang mga ini sang gilayon nga bulig.
Kadungan sini, nagpanawagan si Sumagaysay sa mga pumuluyo sang Tupi nga mangin mabinantayon sa panahon labi na kun magbubo ang mabaskog nga ulan kag may dala nga mabaskog nga hangin.
