KORONADAL CITY – Ginkumpirmar sang South Korean health authorities nga isa ka 45-days old nga lapsag ang pinakalamharon nga biktima nga nalatnan sang novel-coronavirus.
Ini ang ginpahayag ni Girlie Simpao Yoon, isa ka Filipina nga nakapuyo sa nasambit nga pungsod sa interbyu sang Bombo Radyo.
Suno kay Yoon, nakuha sang lapsag ang nasambit nga virus makaligad nalatnan man ang amay sini nga miyembro sang Shincheonji religious organization.
Gani tuman na lang ang kaakig sang mga Koreano sa founder sini nga si Lee Man Hee bangud sa pagpabaya suno pa sini nga naglapta ang virus sa ila pungsod labi na sa Daegu City.
Pamatuod sini suno kay Yoon, tuman ang kaakig sang iya mister nga Koreano sa nasambit nga founder labi na nga unod sang mga balita didto ang nasambit nga mga isyu.
Sa subong ginakabalak-an nga magadamo pa ang mapagkit nga kaso makaligad ginpahayag ni Yoon base sa balita nga masobra 21,000 ka tawo ang under monitoring nga posible nga nalatnan sang nasambit nga balatian kag kasamtangan nga ginapaidalom sa quarantine.
