KORONADAL CITY – Nagsaka pa sa 40 ka mga pamalay ang nangin apektado sa pagpanalasa sang buhawi sa bahin sang Sitio Santa Cruz, Barangay Milbuk, Palimbang, Sultan Kudarat.
Sa interview sang Bombo radyo Koronadal kay Mayor Joenime Kapina- alkalde sang munisipyo sang Palimbang, Sultan Kudarat ginpahayag sini nga yara sa 6 ka panimalay ang totally damaged samtang 35 naman sa mga ini ang partially damaged.
Nagapadayon naman ang pagpatigayon sang damage assessment sang Sultan Kudarat Provincial Disaster Risk Reduction and Management Office sa danyos nga gintuga sang kalamidad sa mga apektado nga mga pamilya sa lugar.
Madasig naman nga nagpaabot sang pagbulig ang PDRMMO Sultan Kudarat Operation Center sa nga apektado nga mga pamilya base man sa mando ni Governor Datu Pax Ali Mangudadatu labi pa ang mga pagkaun sang mga residente.
Nagpaabot naman sang mga hygiene kits kag mga importante nga kagamitan ang lokal nga gobyerno sang Palimbang Sultan Kudarat.
Magluwas pa sa Local DRRMOs, ginbisita man sang MSWDO kag MHO ang mga apektado nga mga residente agud nga ma chekyar ang mga ini kag mahibaluan ang naga kaangay nga bulig para sa nasambit nga mga pamilya.
