KORONADAL CITY – Nagapadayon ang assestment kag monitoring sang Barangay LGU sang Barangay. Cacub, Syudad sang Koronadal agud nga mahibaluan ang tagsa-tagsa ka mga puluy-an nga nangin apektado sang mabaskog nga pag baha kahapon nga adlaw sang Miyerkules, Oktubre 22,2025 .
Sa interview sang Bombo Radyo Koronadal kay Barangay Kapitan Oscar O. Magluyan sang Brgy. Cacub, ginpahayag sini nga masobra sa 40 ka pamilya ang apektado kag nag evacuate, apang sa karon yara na lang sa 25 ka mga nagbakwit nga pamilya ang kasamtangan nga yara sa ila barangay gym.
Dugang pa niya yara na sa maayo nga kahimtangan ang mga nagbakwit nga pumuluyo matapos nga gilayon naghatag sang bulig kag interbensyon ang City Government.
Kaangot sini, nagpanawagan man si Kap. Magluyan sa tanan nga pumuluyo sang Koronadal nga magpabilin nga alerto kag maghalong batok sa banta sang malain nga panahon. Sa karon, yara na lang sa 25 ka mga nagbakwit nga pamilya ang kasamtangan nga nagapadayon nga yara sa barangay gym bangud sa nagluntad nga pagbaha sa nasambit nga barangay.
