KORONADAL CITY -Nagapadayon sa karon ang imbestigasyon sang kapulisan sa nagluntad nga pagpang-ambush patay sa apat ka mga kalalakihan sa bahin sang Ginatilan, Pikit Cotabato.
Ginkilala sang Pikit PNP ang mga biktima nga sanday Kalid Selongan, 28 anyos, Ray Dodong Santander Benias, 47 anyos, Welliam Cantonis, 41 anyos kag Darwin alyas Bugoy Cantonis, 28 anyos nga lunsay mga residente sang Brgy. Fort, Pikit, Cotabato.
Gilayon naman nga nagresponder ang mga otoridad kun diin nasapwan ang mga biktima nga wala na sang kabuhi kag tadtad sang bala.
Naguwa sa imbestigasyon nga sakay sang isa ka duag itom nga Bajaj Motorcycle nga may plate no. AN0296 ang mga ini sang ginbalabagan sang indi pa matumod nga numero sang mga suspek kag wala sang kaluoy nga ginpangluthang.
Nag-angkon sang madamo nga igo sa nagkalain-lain nga bahin sang ila lawas ang mga biktima nga gintunaan sang kamatayon sang mga ini.
Narekober sa crime scene ang ginapatihan nga mga bala sang M16 rifle.
Sa karon, indi pa matumod ang motibo sang pagpang-ambush kag kun sin-o ang responsable sa pagpatay sa mga biktima.
