KORONADAL CITY – Nagapanawagan sang bulig ang pila ka mga OFWs bangud sa kabalaka sang mga ini makaligad nakapagkit sang apat nga positibo sa COVID 19 sa Riyadh, Saudi Arabia.
Suno kay Mamerto Dacles, Jr. isa ka OFW nasambit nga pungsod kag tumandok sang Prk. Pag-asa, Brgy. Maibo, Tantangan, South Cotabato, ginpakigbahin sini nga madamo sa ila ang nagakabalaka kag nagakahadlok para sa ila kahimtangan makaligad nagpositibo ang iban nga mga kaupdanan nga OFWs sa virus.
Kapin 100 suno pa sila sa ila ginaistaran kag apat sa mga kumpirmado ang yara sa ground floor lamang kag wala pa gindangat sa ospital nga rason man sang ila dako nga kahadlok.
Ginpahayag man ni Dacles nga sa sulod sang 3 bulan, pautay-utay suno pa ang paghatag sa ila sang bulig sang ila employer, ahensiya mangin ang gobyerno sang Pilipinas.
Nagalaum lamang ang mga ini sa mga bulig nga ginahatag sang mga himata sang kaupdanan nga OFW nga na-stranded man sa isolation facility sang nasambit nga pungsod.
Wala man sila nakahibalo sa pagahimoon nga tikang bangud amat-amat man nga nagapakita sang sintomas ang iban nila nga kaupdanan.
Sa subong, hugot kag ginalikawan na sini ang pagguwa pa sa pasilidad agud malikawan nga maka-contact ang sin-oman agud masiguro nga indi ini makalaton.
