KORONADAL CITY- Nakahanda suno pa nga atubangon ni Mr. Agustin Josep kag sang bata sini nga si Jerson Josep kag 2 pa ka mga kabataan sini nga lalaki ang kaso nga ginsang-at batok sa ila angot sa pagpatay kay Juvelyn Panday, 23 anyos sa Brgy. Paraiso, syudad sang Koronadal.
Nahibaluan nga si Juvelyn Panday ang 23 anyos nga iloy nga ka live-in partner ni Jerson Josep ang namissing sang Agusto 2, 2019 kag nasapwan sang ulihi nga semana sang Agusto nga naga-agnas na nga bangkay sa talamnan sang kawayan sa Brgy. Paraiso.
Sa eklsusibo nga interbyu sang Bombo Radyo Koronadal kay Agustin Josep nga umagad ni Juvelyn, ginkakibot suno pa sini nga nadalahig ang iya pangalan kag sang iya mga kabataan sa pagpatay sa iya nga umagad bangod palangga suno pa sang pamilya si Juvelyn.
Gin-insister sini nga indi mahimo sang bata sini nga si Jerson nga patyon ang kaugalingon sini nga live-in partner bangud palangga man suno pa sini si Juvelyn.
Wala man sila makahibalo kun paano nadalahig ang ila nga pangalan sa krimen bangud sila mismo ang nagkabalaka man kag nagpangita kay Juvelyn sang na-missing ini.
Dugang pa sini nga ila man suno pa ginpa blotter ang pagkadula ni Juvelyn agud maalarma ang mga otoridad tubtob sa nasapwan ini nga nagakaagnas na lamang nga bangkay.
Nagakabalaka sila bangud nagadumot na ang pamilya ni Juvelyn sa ila rason nga nagalie-low sila sang gina istaran.
Sa karon nakapadulong na sa Koronadal City Police Station si Mr. Agustin Josep agud ipresentar ang iya kaugalingon kag magdepensa sa mga akusasyon nga gina haboy batok sa iya kag sang tatlo sini ka mga kabataan nga lalaki lakip na ang live-in partner ni Juvelyn Panday.
