Boluntaryo nga nagsungka ang apat (4) ka miyembro sang Bangsamoro Islamic Freedom Fighters (BIFF) sa mga tinawo sang Criminal Investigation and Detection Group – Regional Field Unit BAR sa Pusao, Shariff Saydona Mustapha, Maguindanao del Norte.
Ginkilala ni Police Lieutenant Colonel Ariel T Huesca, Regional Chief sang PNP Criminal and Investigation and Detection Group (CIDG) Regional Field Unit Bangsamoro Autonomous Region, ang mga nagsungka nga sanday alyas “Matsu”, 36 anyos; alyas “Ar”, 31 anyos; alyas “Ben”, 27 anyos; alyas “Yahya”, 21 anyos; nga lunsay mga residente sang nasambit nga lugar.
Ang boluntaryo nga pagsungka sang apat ka mga miyembro sang Bangsamoro Islamic Freedom Fighters sa idalom sang Karialan Faction sang 105th Moro Islamic Liberation Front Base Command ang natigayon sa bulig sang mga tinawo sang CIDG RFU BAR kabulig ang Regional Special Operations Team, Mindanao Action Police Intelligence Office kag Maguindanao del Sur PPO.
Kadungan sang boluntaryo nga pagsungka sang mga ini bitbit nila ang ila mga armas nga ginalakipan sang improvised 50 caliber Barret rifle, duha ka 60mm mortar, isa ka yunit sang homemade RPG.
Sa karon, padayon nga ginaawhag sang mga opisyal ang iban pa nga myembro sanng BIFF nga magsungka naman agud nga makapangabuhi sang malinong kag matawhay.
