KORONADAL CITY – Yara na sa kustodiya sang Isulan PNP ang 4 ka mga naarestar nga persona sa ginpatigayon nga simultaneous drug buybust operation sang mga otoridad.
Ini ang ginpahayag ni P/Supt. Joefel Siason sa interbyu sang Bombo Radyo Koronadal.
Suno kay Siason, una nga ginlunsar ang operasyon alas-8:15 kagab-i kun diin naarestar ang target nga si Felizardo Aguilar kaupod si Carl John Impao.
Nahibaluan nga si Aguilar ang madugay na nga nagsungka sa mga kapulisan apang nagbalik naman sa anay sini nga iligal nga hilikoton.
Nakuha sa mga ini ang 5 ka mga plastic sachet nga ginapatihan nga shabu.
Dugang pa ni Siason nga liwat naman nagpatigayon sang drug operation alas-9:30 kagab-i kun sa diin naarestar naman ang 2 ka mga persona nga sanday John Mark Daroca nga residente sang Davao City kag ang kaupod sini nga si Romel Siaotong nga residente sang Isulan Sultan Kudarat.
Nahibaluan nga si Daroca ang madugay na gina-surveillance sang mga otoridad bangud sa pagduso sang illegal nga droga.
Nakuha sa mga suspek ang 6 ka platic sachet sang ginapatihan nga shabu.
Samtang, natalana naman nga pasakaan sang kaso ang 4 ka mga suspetsado bangud sa pagbayolar sa RA 9165 ukon Comprehensive Dangerous Drugs Acts of 2002.
