KORONADAL CITY – Masubo nga ginpalab-ot sang pamilya sang isa sa 32 ka mga Kristiyano nga na-trap sa isa ka edifisyo sa siyudad sang Marawi nga ginauyatan na sila sang mga terorista nga Maute.
Ini makaligad nga ginsulod sang mga armado nga Maute ang edifisyo nga ila ginapanaguan.
Pasado ala-1 kaina sang hapon sang nagpadala sang mensahe si alyas Bonjing sa himata sini nga nakuha na sila sang mga armado nga gintawag sini ISIS kag pagkatapos sadto indi na makontak pa ang cellphone sini.
Madumduman nga kaina pasado alas-6 sang aga, eksklusibo pa nga nainterbyu sang Bombo Radyo Koronadal si alyas Bonjing kun diin personal ini nga naghingyo sang bulig nga marescue sila bangud nagapalangurog na sila sa kahadlok, wala sang makain, wala sang mainom kag 4 ka adlaw na nga yara sa trauma sa nasambit nga edifisyo.
Nahibaluan nga 11 sa mga kaupdanan nila ang mga kabataan nga nagamasakit na bangud sa tuman nga kahadlok nga mapugutan sang ulo.
Samtang, nagpahayag naman sang kasubo ang LGU Marawi sa panibag-o nga balita bangud luyag man nila nga ma-rescue gilayon ang mga ini, tuman ka delikado para sa militar labi na nga nagpamahog ang Maute nga patyon ang ila mga hostages sat ion nga sudlon sang tropa sang militar.
Kaangot sini, nag-apela naman sang pangamuyo ang pamilya ni alyas Bonjing para sa mga hostages kag nagalaum nga maluwas pa ang kabuhi sang mga ini.
