Nagdangat na sa 30 ka tawo ang napatay bangud sa lapnagon nga pagbaha kag landslides sa estado sang Minas Gerais sa southeastern nga bahin sang Brazil.
Magluwas sa mga napatay, malapit 40 pa ka persona ang gin-report nga missing, samtang padayon ang search and rescue operations sang mga otoridad.
Madamo man nga kabalayan ang nagkalaguba kag ginbaha, bangud sang mabaskog nga pag-ulan nga nagdala sang pagtaas sang tubig sa mga suba kag pagkatiphag sang duta sa nagkalain-lain nga komunidad.
Bangud sini, gindeklarar na ang state of calamity sa nasambit nga estado agud mapadasig ang pagpagwa sang pondo para sa relief operations kag humanitarian assistance sa mga apektado nga pamilya.
Nagpanghatag na man sang temporary shelters, pagkaon, tubig kag medikal nga bulig ang lokal nga gobyerno samtang ginatamdan ang mga nabudlayan nga residente.
Nagpalab-ot naman sang iya pagpakig-unong sa pamilya sang mga biktima si Luiz Inácio Lula da Silva kag nagpasalig nga magahatag sang dugang nga bulig ang pederal nga gobyerno agud makabangon ang mga komunidad nga grabeng naapektohan sang kalamidad.
Ginpahayag man sini nga prayoridad sang administrasyon ang pagpasiguro sang kaluwasan sang katawhan kag ang madasig nga rehabilitasyon sang mga apektado nga lugar.
