KORONADAL CITY – Arestado ang tatlo ka mga indibidwal sa ginpatigayon nga operasyon batuk sa illegal nga droga sa nagkalain-lain nga banwa sa probinsya sang South Cotabato.
Ini ang ang resulta sang padayon nga kampanya sang South Cotabato Police Provincial Office (SCPPO) sa idalom sang pagpamuno ni PCol. Samuel T. Cadungon.
Una nga naaresto sa Brgy. Poblacion, T’boli, South Cotabato sang joint forces sang SCPPDEU, T’boli MPS, MDEU, 2nd SCPMFC, kag SCPIU sa koordinasyon sang PDEA 12 si alyas “Kulot”, 36 anyos ang edad.
Nakuha sa iya ang ginabanta 15 gramo sang ginapatihan nga shabu nga nagabalor sang ₱102,000.00, mga bala kag nagkalain-lain nga kagamitan sa pagdroga.
Ginsundan ini sang operasyon nga ginpatigayon sang Tupi PNP sa koordinasyon sang PDEA 12 kun diin nadakpan sa buy-bust operation sa Brgy. Poblacion, Tupi si alyas “Jeloy”, 25 anyos nga residente sang nasambit nga lugar.
Nakuha sa iya ang ginapatihan nga shabu nga nagabug-at sang mga 1.0 ka gramo nga nagabalor sang ₱6,800.00, lakip ang mga drug paraphernalia.
Samgtang, sa bahin sang Polomolok, nadakpan sang mga otoridad ang isa ka retirado nga miyembro sang AFP nga ginkilala kay alyas Allan, 55 anyos nga residente sang Brgy. Pagalungan, Polomolok, South Cotabato.
Nakuha sa suspek ang 5.1 gramo sang ginapatihan nga shabu nga nagabalor sang ₱34,000.00, lakip ang kwarta nga gingamit sa buy-bust kag isa ka pouch.
Sa karon, natalana na nga pasakaan sang kaso nga paglapas sa section 5, 11, kag 12, Artikulo II sang RA 9165, kag RA 10591.
