KORONADAL CITY – Ginpasidunggan ang 3 ka suldado kag 3 ka myembro sang CAFGU bilang pagkilala sang ila nga pagkabaganihan kag kaisog batuk sa terorista nga Bangsamoro Islamic Freedom Fighters ukon BIFF sa probinsya sang Maguindanao.
Ginkilala ang mga suldado nga ginhatagan sang Wounded Personnel Medal sanday Cpl. Ericson Baliza, PFC Tirso Magalong nga nakadestino sa 5th Special Forces Battalion kag PFC Jade Panigon nga naghalin naman sa 57th Infantry Battalion.
Magluwas sa mga ini, ginpasidunggan man ang 3 ka CAFGU member nga sanday Jhonny Tumbaga, Danilo Faustino kag Edwin Bastida sang 38th Infantry Battalion.
Ginhatagan ang mga ini sang medalya sa pagpanguna ni 6th Infantry Division Commander, Maj. Gen. Diosdado Carreon sa Camp Siongco Station Hospital, sa Awang, Datu Odin Sinsuat Maguindanao.
Samtang suno naman kay 6ID Phil Army spokesperson Lt.Col. Roberto Breboneria nga ang paghatag sang Wounded Personnel Medal ang pagkilala sa ila nga kaisog agud nga pakigbatuan ang terorismo kag kalakasan.
Nahibaluan nga ang nasambit nga mga suldado ang napilasan sa ginlunsar nga Law Enforcement Support Operation batuk sa pwersa sang BIFF kag Dawla Islamiya sa SPMS box.
