KORONADAL CITY – Naglab-ot na sa tatlo ka Sitio sa Barangay Colonggulo sa banwa sang Surallah, South Cotabato ang apektado sang diarrhea ukon pagpalanakit sang tiyan kag pagpalanuka tuga sang ginapatihan kontaminado nga ilimnon nga tubig.
Sa pagkamatuod, sa eksklusibo nga interbyu sang Bombo Radyo Koronadal kay Barangay Chairman Bobby Ello, isa ka menor de edad na ang ginbawian sang kabuhi bangud sa dehydration kag may 3 ka mga pamilya na ang nahospital bangud sa nasambit nga sakit.
Ginkilala ang napatay nga si Marvin Tualang, 8-anyos nga residente sang Sitio Villa Elleaga samtang gindala naman sa hospital ang amay sini nga si Kiting Tualang, utod nga si Gina kag ang isa pa nila ka upod sa puluy-an nga menor de edad.
Suno kay Ello, una nga nakaeksperiensiya sang pagpalanakit sang tiyan, pagpalanuka kag pagpamuhin ang mga biktima matapos nga mag-inom sang tubig halin sa bubon.
Nahibaluan nga ang source sang ilimnon nga tubig sang mga residente sa Sitio Villa Elaga, Matinong kag Kalma ang nagikan sa bubon kag Spring bangud wala pa sang water system sa ila nga lugar.
Apang, nagpatigayon na sang assessment kag validation ang Municipal Health Office sang Surallah kaupod ang Provincial Health Office sang South Cotabato agud nga mahibaluan kun ang ilimnon nga tubig sang mga residente ang ginhalinan sang sakit.
