KORONADAL CITY – Naglab-ot sa tatlo ka mga indibidwal ang napilasan matapos nga maipit sang natumba nga puno sang kahoy sa mga stalls sang Ukay-Ukay sa Rizal Park diri sa siyudad sang Koronadal kadungan sang naeksperiensiyahan nga mabaskog nga hangin kag ulan.
Ini ang ginkumpirmar ni City Disaster Risk Reduction and Management Officer (CDRRMO) Cyrus Urbano sa interview sang Bombo Radyo Koronadal.
Suno kay Urbano bangud sa mabaskog nga hangin dala sang pagbuhos sang mabaskog man nga ulan, wala mabantayan ang pagkatumba sang puno sang Talisay sa Rizal Park nga nagtupa sa mga stalls.
Gilayon naman nga ginbuligan ang mga indibidwal nga pilason nga ginkilala kanday John Lloyd Castillo, 22 anyos, alyas Jeffrey, 16 anyos, lunsay mga residente sang Brgy. Dadiangas East, Gensan; kag isa ka Jennifer Kris Tabanao, 20 anyos, residente ng Brgy. Poblacion, Polomolok.
Nakaangkon sanday John Lloyd at Jeffrey sang mga bali sa natuo nga paa, samtang pilason naman sa abaga si Jennifer.
Sa karon, nagapaayo sila sa South Cotabato Provincial Hospital.
Nagpatigayon man sang clearing operation ang mga otoridad sa mga sanga sang natumba nga puno.
Sa karon, pila ka mga stalls sang Ukay-Ukay ang apektado sa Rizal Park.
Nahibaluan nga ang mga ini ang nagadisplay sang mga baligya kadungan sang selebrasyon sang Tnalak festival sa probinsiya.
