MAGUINDANAO DEL NORTE – Naglab-ot sa tatlo ang patay samtang 31 naman ang gindala sa hospital sa coastal municipality sang Datu Blah Sinsuat sa Maguindanao del Norte matapos nagkaon sang pawikan (sea turtle).
Suno sa Municiapl Disaster Risk Reduction and Management Office (MDRRMO)) Datu Blah Sinsuat, kalakip sa gindala sa hospital ang duha ka nagabusong nga babaye kag 6 pa ka mga menor de edad.
Ang mga napatay ang ginalakipan sang 68-anyos nga lalaki, ang bata sini nga 48-anyos kag isa pa ka 56-anyos nga lunsay mga residente sang lugar kag myembro sang Teduray Indigenous tribe.
Sandig sa report, nagbakal sang pawikan sa kantidad nga P300 ang mga ini kag gin-adobo para sa panyaga.
Apang matapos nga makakaon, nagsugod na ang mga ini sa pag-eksperiensiya sang pagpalanakit sang tiyan, pagpalanuka, diarrhea kag pagka-locked jaw.
Dako suno pa ang posibilidad nga toxic ukon poisononous ang nakaon nga pawikan sang mga residente bangud sa duag pula nga shell sini.
Nahibaluan nga masami na nga nagaihaw sang pawikan ang mga residente sa lugar bilang pagkaon kag sini lamang nga tion nga naka-eksperiensiya sang pagkahilo.
Nadala pa sa Lebak District Hospital ang mga biktima apang tigayon nga ginbawian sang kabuhi ang 3 sa mga ini.
Sa karon, padayon nga gintutukan ang mga nahospital bangud mangin ang mga hinuptan nga sapat sang mga ini nga nakakaon sang unod sang pawikan ang napatay man.
Photos courtesy: Datu Mohamad Sinsuat Jr.
