KORONADAL CITY– Ginapangita na sa karon ang driver sang isa ka van makaligad mabungguan ang isa ka motorsiklo sa banwa sang M’lang, North Cotabato.
Sa impormasyon nga ginpalab-ot sa Bombo Radyo Koronadal, nagluntad ang insidente sa Prk. Centro, Brgy. New Rizal sa banwa sang M’lang, North Cotabato kun sa diin ginasuroy sang motorsiklo ang alagyan nga ginamaneho ni Efren Pagdato, 48 anyos sakay sanday Conchita Buenaventura, 48 anyos may asawa, Ken Nathaniel Cabana Fuentes, 3 anyos kag Aldrin Jay Cataluna Cabana 9 anyos.
Pareho naman nga direksyon suno pa ang ginatuhoy sang motorsiklo kag sang van sang mabungguan sang van ang likod nga bahin sang motorsiklo.
Nagtabog suno pa ang driver sang motorsiklo nga si Pagdato mangin ang sakay sini nga si Buenaventura kag ang 2 ka menor de edad kun sa diin dead on the spot ang 3 samtang nadala pa sa balay bululngan ang siyam ka tuig nga si Aldrin Cabana.
Sa karon padayon pa ang imbestigasyon sang mga otoridad kag ginahibalo pa kun sin-o ang driver sang van nga nagpalagyo makaligad ang insidente.
