KORONADAL CITY – Naglab-ot na sa 3 ang ginbawian sang kabuhi samtang 3 man ang pilason sa nagluntad nga pag-arado sang SUV sa isa ka motorsiklo sa banwa sang Tantangan, South Cotabato.
Ini ang ginkumpirmar ni PSI Reden Crisologo, hepe sang Tantangan PNP sa interbyu sang Bombo Radyo Koronadal.
Suno kay Crisologo, dead on the spot ang driver sang motorsiklo nga si Danny Panting nga residente sang Brgy. Poblacion, Tantangan, South Cotabato matapos mautod ang duha ka tiil sini.
Sunod nga napatay sa hospital ang mag-amay nga bystander nga nalamita sa aksidente nga nakilala nga sanday Mar Roel Panelo kag bata sini nga si Clarence Panelo.
Samtang pilason naman sanday Wilmar Panelo nga yara sa kritikal nga kondisyon sa subong kaupod man sanday Anthony Anipan kag Vincent Solongon.
Naguwa man sa imbestigasyon sang Tantangan PNP nga padulong sa siyudad sang Koronadal ang driver sang SUV sang hinali lamang nga nagtabok ang motorsiklo rason nga nabunggo niya ini kag sa kabaskog sang impact may mga bystander nga nalamita sa pagbaslikad sang salakyan.
Gindapa pa sa hospital ang driver sang SUV nga si Roger Ascarada sang President Quirino, Sultan Kudarat matapos magsaka ang blood pressure sini.
Apang, indi sa gihapon abswelto si Ascarada sa kaso nga Wreckless Imprudence resulting to multiple homicide.
