KORONADAL CITY – Ginbawian sang kabuhi ang tatlo ka indibidwal samtang pito naman ang pilason sa pag-arado sang isa ka government vehicle sa duha ka motorsiklo pasado alas-6:00 kagab-i sa national highway, Purok Ilang-Ilang, Barangay Saravia, Koronadal City.
Sa interview sang Bombo Radyo Koronadal kay PMSgt. Leo Dimaculangan, traffic investigator sang Koronadal City PNP, ang mga napatay nga sanday Rogela Bayang, 26-anyos, residente sang Purok Acharon, Calumpang, General Santos City; kag mag-utod nga sanday Rhialyn Hilaria, 21-anyos kag Vivian Hilaria, 18-anyos, lunsay mga residente sang nasambit nga lugar.
Suno kay PMSgt. Dimaculangan, gikan sa construction site ang pick-up kag padulong sa siyudad sang Koronadal sang magluntad ang aksidente.
Nag-overtake ang pick-up truck nga ginapanag-iyahan sang Bureau of Fisheries and Aquatic Resources (BFAR XII) sa topdown nga ginasundan sini nga yara sa inner lane apang may nakaharang nga tricycle gani naghana ini nga magbalik sa iya nga linya apang wala natigayon rason nga nagdiritso na lamang ini.
Sakto man nga yara sa pihak nga linya ang duha ka motorsiklo nga amo ang nabungguan sini matapos madulaan sang kontrol ang driver.
Sa kadasig sang pagmaneho sang driver sa pick-up makapila ka beses ini nga nag-sirko tubtob na-drag ang mga motorsiklo kag napintalan antes nga nagtabog sa kilid sang kanal.
Sa kabaskog sang impact sa pagkabunggo sini, dead on the spot ang mag-utod nga Hilaria kag ang isa ka manunudlo, samtang gindala naman sa South Cotabato Provincial Hospital ang pito ka pilason nga sakay sang government vehicle nga sanday James Boy Enrejo, 38-anyos, driver ng pick-up; Roderick Tapon, 49-anyos; Reynan Lara, 40 anyos; Ryan Tapon, 22-anyos; Kenneth Frunda, 24-anyos; lunsay mga residente sang Barangay Ran-ay, Banga, samtang ang duha ka iban pa gindala sa pribado nga hospital.
Halos indi naman mabaton sang pamilya sang mga napatay ang natabo sa ila mahal sa kabuhi apang hingyo na lamang sang mga ini nga buligan sila sa pagpalubong sa ila mga himata.
Nakig-angot naman ang talatapan sang BFAR-12 sa pamilya sang mga napatay agud nga makig-istorya sa nagluntad nga aksidente.
Ginpasiguro naman ni OIC Assistant Regional Director Omar Sabal, BFAR XII nga nakahanda sila nga magbulig sa pamilya sang mga napatay bangud sa pagka-involbar sang service vehicle sang ila nga talatapan.
