KORONADAL CITY – Nakapagkit na sang 3 nga patay ang probinsya sang North Cotabato dala gihapon sang wala untat nga pagbubo sang ulan dala sang malain nga panahon.
Ini ang ginpahayag ni Engr. Arnulfo Villaruz, Chief for operations sang PDRRMO-North Cotabato sa interbyu sang Bombo Radyo Koronadal.
Suno kay Villaruz, ang napagkit nga 3 nga napatay ang ginalakipan sang 2 ka indibidwal nga natabunan sang landslide samtang nagakay-o sang dike sang ila nga lugar sa Carmen , North Cotabato samtang isa naman ang nalumos sa suba samtang nagapaligo sa banwa sang Banisilan.
Dugang pa sang opisyal apektado man sang pagbaha ang mga banwa sang Pikit,Kabacan,Arakan kag Carmen sa North Cotabato.
Sa banwa sang Pikit, 21 ka mga barangay na ang apektado sang pagbaha kung diin nagalab-ot sa masobra 15,000 pamilya ang naapektuhan sang pag-awas sang tubig sa Liguasan Marsh.
Samtang yara naman sa 200 pamilya naman sa Sitio Lumayong, Barangay Kayaga, Kabacan ang apektado sa pag-awas sang tubig sa Lumayong Bridge nga nagakonekta sa banwa sang Kabacan kag Carmen.
Ginakabalak-an man nga mag-awas ang tubig sa pila ka nga suba kun magpadayon pa ang pagbubo sang ulan bangud man sa posible nga pag-awas sang 2 ka dalagko nga river system sa North Cotabato nga Pulangi river nga gikan pa sa Bukindon kag Kabacan River sa North Cotabato nga pareho nga magaagi sa Lumayong Bridge.
Kaangot sini, nagapatigayon na ang LGU-North Cotabato sang relief operations sa mga apektado nga residente.
Samtang, nagpatigayon man sang assessment ang PDRRMO-North Cotabato para sa dugang nga training sang mga residente sa “worst-case-scenarios” nga posible nga matabo pa ilabi na nga may isa pa ka malain nga panahon nga magasulod sa PAR sa palaabuton nga adlaw sang Lunes.
