KORONADAL CITY– Naglab-ot na sa 3 ang nabiktima sang palupok sa probinsiya sang South Cotabato sa selebrasyon sang Paskukwa kag Bag-ong Tuig.
Ini ang sandig sa ginpaguwa nga datos sang Fireworks-Related Injury Surveillance Bulletin sang Integrated Provincial Health Office (IPHO) humalin sang Disyembre 21 tubtob Disyembre 26, 2022.
Ang duha ka kaso ang napagkit sa banwa sang Polomolok kag isa na diri sa siyudad sang Koronadal City.
Ang mga biktima ang lunsay mga lalaki nga nagaedad sang 7 tubtob 50 years old.
Suno sa report, nakaangkon sang blast ukon burn injury kag wala man nautdan sang tudlo ang mga biktima.
Ang nagkalapilasan ang nalukpan sang mga legal firecrackers kasubong sang kwitis, pop-pop kag pyrotechnic.
Nagapasalamat naman ang mga otoridad nga wala pa sang may napagkit nga patay kag wala man sang may narecord nga stray bullet incident sa probinsiya.
Liwat naman nga nagpanawagan ang IPHO-South Cotabato nga magpamati sa Iwas Paputok campaign sang gobyerno.
