KORONADAL CITY – Naglab-ot sa tatlo ka mga probinsiya sa bug-os nga Socsksargen ang apektado sang malapnagon nga baha, buhawi kag landslide nga tuga man sang sunod-sunod nga pagbuhos sang ulan sa rehiyon.
Ini ang ginpahayag ni Ms Jorie Mae Balmediano, Information Officer sang OCD 12 sa eksklusibo nga interbyu sang Bombo Radyo Koronadal.
Kalakip sa mga apektado nga probinsiya ang South Cotabato, North Cotabato at Sultan Kudarat.
Dugang pa ni Balmediano, halos isa (1) ka libo nga pamilya man ang nagbakwit sa kasagsagan sang baha sa mga banwa sang Bagumbayan, Lutayan, Lambayong kag Tacurong City sa Sultan Kudarat.
Kaupod man sa mga ginbaha ang yara sa masobra 600 ka pamilya gikan sa siyudad sang Koronadal kag mga banwa sang Tampakan kag Norala diri sa probinsiya sang South Cotabato.
Magluwas sini, yara man sa ginatos ka pamilya ang apektado indi lamang sang baha kundi mangin sang buhawi sa probinsiya sang North Cotabato partikular na sa mga banwa sang M’lang, Tulunan, Magpet kag Kabacan.
Halos 400 ka panimalay man ang ginguba sang mabaskog nga hangin sa M’lang kag Tulunan kun diin ginahibalo pa subong kun pila ang partially kag totally damaged.
Sa subong, padayon pa nga ginahibalo ang kabug-usan nga damyos nga ginbilin sang kalamidad sa mga apektado nga residente, agrikultura kag mga imprastruktura sa Region 12.
