KORONADAL CITY- Tigayon nga nagsurender sa mga otoridad ang 3 ka mga matag-as nga lider sang komunista nga grupo sa may bahin sang Sultan Kudarat.
Ang mga nasambit nga nagsungka ang ginkilala kay Abel, alias Jumper kag alias Teks sa mga katapo sang 37th Infantry (Conqueror) Battalion sa Brgy Tibpuan, Lebak, Sultan Kudarat.
Pagsalig suno pa sa gobyerno kag pangandoy nga magbag o ang ila palangabuhian ang nag duso sa tatlo ka mga matag-as nga lider sang komunista nga grupo ang rason kung ngaa nagbalik sila sa sabak sang gobyerno.
Nahibaluan nga si Alias Abel ang isa sa Political Instructor, samtang ang duha naman ang lunsay mga vice commanding officer sang platoon Timlas kag Beijing.
Dala sang mga ini ang ila nga mga gamit nga ginakalakipan sang isa ka 7.62mm M14 Rifle; isa ka 5.56mm M4 Carbine (KH-416) kag isa ka Cal .45 Pistol (COLT MK-IV).
Nahibaluan ang mga ini ang makabaton sang nagakaigo nga bulig lakip na ang financial assisstance kadungan sang pagbag o sang ila kabuhi.
Nahibaluan nga ang LGU sang Kalamansig kag mga kaipi nga lugar ang nagabuliganay para sa katawhayan sang ila nga lugar ilabi na ang peace and order.
Kung madumduman, una na ang ginpahayag ni Lt. Col. Dennis Almorato, ang Spokesperson sang 6ID Phil. Army nga sila ang padayon sa paghatag ligwa kag pangpang awhag sa mga terorista nga grupo nga magbalik na sa sabak sang gobyerno.
