Ginsunog sang wala pa makilal-an nga mga suspek ang tatlo ka mga bulothuan sa magkatuhay nga lugar sa probinsya sang Maguindanao kag Lanao del Norte, base sa report sang Commission on Elections (Comelec).
Suno sa report, ala-1:50 sang kaaganhon nagluntad ang sunog sa Ruminimbang Elementary School sa may Barangay Ruminimbang, Barira, Maguindanao, kun sa diin gintupok sang kalayo ang pila ka mga hulot-klasehan humalin sa Grade 1 tubtob Grade 4.
Nasunog man ang Dalican Pilot Elementary School sa Poblacion, Dalican, Datu Odin Sinsuat, Maguindanao del Sur takna alas-4 sang aga kagapon nga adlaw sang Sabado.
Sa isa pa ka report, takna las-2 man sang kaaganhon sang gintupok man sang kalayo ang Poorna Piagapo Central Elementary School sa Old Poblacion, Poona Piagapo, Lanao del Norte.
Suno sa COMELEC, yara sa “red category” ukon “election area with grave concern” ang Barangay Ruminimbang kag posible may kaangtanan ang pagsunog sa maabot nga BSKE 2023.
Nahibaluan nga ang nasambit nga mga bulothuan ang pagagamiton bilang polling precinct sa Oktubre 30. Padayon pa sa karon gina-imbestigahan sang mga otoridad ang nagluntad nga mga insidente.
