KORONADAL CITY- Hugot nga monitoring ang ginapatuman sang South Cotabato Provincial Disaster and Risk Reduction Management Office kag sang lokal nga gobyerno sang Tampakan, South Cotabato bangud sa mga napagkit nga pagkatiphag sang mga duta sa 3 ka mga barangay sa nasambit nga banwa.
Nahibaluan nga nagdeklarar sang state of calamity ang 3 ka barangay sa nasambit nga banwa makaligad maka eksperyensya sang pagbaha kag landslide bangud sa mabaskog nga pagbubo sang ulan tuga sang malain nga paniempo.
Sa subong deklarado na nga yara sa state of calamity ang mga barangay nga ginalakipan sang Kipalbig, Palo 19 kag Tablu kun sa diin tuman nga apektado ang mga palangabuhian sang mga residente ilabi na ang mga nagasalig sa ila mga pananom nga ginguba sang mga pagbaha.
Ginabulubanta nga indi magnubo sa 100 ka indibidwal ang yara sa temporary shelters kag nagahlat sang dugang nga bulig.
Sa inisyal nga impormasyon may mga puluy-an man nga naguba kag mga kalsada nga indi maagyan kag naguba.
Bangud sa nasambit nga panghitabo anuman nga oras posible igapaidalum sa state of calamity ang Tampakan South Cotabato bangud damyos nga natuga nga ginalauman nga magasaka pa.
Nagpahanumdum naman si South Cot. PDRRMO chief Mila Lorca nga mangin vigilante ang mga pumuluyo sa probinsya anuman nga oras angot sa mga nagaluntad nga kalamidad kag ipasiguro ang kaluwasan kag magbakwit ang mga yara sa landslide kag flood prone areas.
