KORONADAL CITY- Naglab-ot sa 3 ka mga barangay sa banwa sang Bagumbayan, Sultan Kudarat ang gindalasa sang baha matapos ang pagbuhos sang mabaskog nga ulan humalin kagab-I tubtob kaina sang kaagahon.
Ini ang ginkumpirmar ni Mr. Harry John Hurtada, chief for operations and warning sang MDRRMO Bagumbayan sa interview sang Bombo Radyo.
Suno kay Mr. Hurtada , ang nasambit nga mga lugar ang ginalakipan sang Barangay Poblacion, Daguma kag Kapaya . Nahibaluan nga sa pila ka mga areas sa sini nga mga barangay nagalab-ot sa lampas hawak ang baha rason nga ginpabakwit ang mga residente ilabi na sa mga yara sa kilid sang suba.
Sa pagkamatuod sa nangin isolated ang Barangay Daguma bangud sa mataas nga tubig baha nga dulot sang pagbuhos sang ulan humalin kagab-i tubtob kaina sang kaagahon
Sa karon, ginatos ka mga pamilya ang apektado, masobra 50 ka ektarya sang palayan ang naguba, may mga nagkalaanod man nga sapat kasubong sang baboy kag baka subong man mga fishpond nga gin-anod sang baha.
Gin-rekomendar man sa mga eskwelahan nga nagapatigayon sang face to face classes nga temporaryo nga suspendiron ang klase para sa safety sang mga estudyante.
Aminado man si Hurtada nga ang nasambit nga mga barangay ang ginakabig nga mga flash flood prone areas bangud “catch basin” ang mga ini sang mga tubig-baha halin sa nagkalain-lain nga mga probinsiya.
Samtang, nagapanawagan man ang opisyal sa mga residente nga mag-ulu-aligmat kag vigilante sa tion nga magbuhos naman ang mabaskog nga ulan.
