Ginpakumpirmar sang Police Regional Office–Bangsamoro Autonomous Region (PRO-BAR) nga ang tatlo ka bangkay nga natukiban sa isa ka talamnan sang goma sa Sitio Goma, Barangay Nabundas, Shariff Saydona Mustapha, Maguindanao del Sur amo ang mga missing nga residente sang Calatagan, Batangas.
Suno kay Police Lt. Col. Jopy Ventura, tigpamaba sang PRO-BAR, nakuha ang identities sang mga biktima pagkatapos makumpirmar sang ilang mga himata ang pagkaangay sang mga biktima sa ila personal nga gamit kag bayo.
Base sa imbestigasyon, ulihi nga nakita ang tatlo sang Mayo 11 samtang nagadeliver sang ila mga kambing sa nasambit nga lugar. Pagkatapos sang pila ka adlaw nga wala sila nakapauli, ginreport na sila nga missing persons.
Nadiskubre ang ila mga patay nga lawas sang Biyernes, nga nakalubong sa nabaw nga hukay kag nakahigot pa ang mga kamot — isa ka indikasyon nga posible sila biktima sang brutal nga krimen.
Isa ka concerned citizen ang nagtudlo sang impormasyon sa mga otoridad nga amo ang nagtultol sa lugar kun sa diin nakit-an ang mga bangkay.
Padayon ang imbestigasyon sang kapulisan agud matukiban kon sin-o ang responsable sa krimen kag kon ano ang posible nga motibo sa likod sini.
Ginausisa man sang mga imbestigador ang posibilidad nga may koneksyon ini sa negosyo ukon personal nga kasumpong.
Ginapanawagan man sang mga otoridad sa publiko nga maghatag dayon sang impormasyon nga makabulig sa pagresolba sang amo nga kaso.
